ڕاگەیاندنی یەکەمین کۆنفڕانسی نێودەوڵەتیی پڕۆژەی ئاوەز

لەو ڕووەوە کە لە بەشێکی بەرچاوی گوتاری ڕۆشنبیریی کوردیدا جۆرێک بەدحاڵیبوون لەمەڕ بابەتی پەیوەندیی نێوان دەسەڵات و مەعریفە لەئارادایە کە خۆی دیاردەیەکە سەر بە ئاراستەی پۆست مۆدێڕنە کوردەکان، پڕۆژەی ئاوەز دەخوازێت بە لەبەر چاوگرتنی نەتەوەی کورد وەکوو نەتەوەیەکی ڕەسەن و شایستەی دەسەڵاتدارییەکی سەردەمیانە و پێشکەوتوو، لەڕێگەی چالاکییە مەعریفی و هزرییەکانی خۆیەوە سنوورەکانی ئەم خراپ تێگەیشتنانە ببڕێت و قامک بخاتە سەر ئەو کێشە و ئاریشانەی گوتاری پۆست مۆدێڕنیزمی کوردی دروستیان دەکات و بەردەوامیش زەقیان دەکاتەوە.  
لەم پێناوەدا و لەسۆنگەی هەستکردن بە بەرپرسایەتیی مەعریفی و هزرییەوە، پڕۆژەی ئاوەز دەخوازێت لە مانگی ٤ی ساڵی ٢٠٢٦، کۆنفڕانسێکی نێودەوڵەتی بە ئامادەبوونی کۆمەڵێک توێژەری کورد و بیانی لەسەر مژاری "مەعریفە و دەسەڵات" بەڕێوە ببات. بۆ ئەم مەبەستە داوا لە توێژەران و لێکۆڵەرانی هێژا دەکەین توێژینەوە زانستییەکانی خۆیان لە چوارچێوەی بابەت و مژارگەلی کۆنفڕانسەکە و بەپێی ڕێبەری توێژینەوەی ژۆڕناڵی ئاوەز بۆ یەکێک لەم چوار ئیمەیلەی خوارەوە بەڕێ بکەن:

[email protected]

[email protected]

[email protected]

[email protected]

 دواوادەی وەرگرتنی توێژینەوەکان 31/03/2026 دەبێت. کۆی توێژینەوە پەسندکراوەکانی کۆنفڕانسەکە وەکوو بابەتەکانی تەوەرەی ژمارە ٧ی ژۆڕناڵی ئاوەز چاپ دەکرێن. بابەت و مژارگەلی گشتیی کۆنفڕانسەکە بریتین لە:

• مەعریفە و دەسەڵات: دەسەڵات چییە؟ دەسەڵات ئەرێییە (ئیجابی) یان نەرێیی (سلبی)؟

• ڕەخنە و دەسەڵات: هاوکێشەی دەسەڵات و مەعریفە چۆن خۆی دەردەبڕێت؟ ڕوانینی ڕەخنەگرانە بۆ دەسەڵات دەبێت خاوەنی چ پاشخانێکی مەعریفی بێت؟ مەعریفە لەسەر دیدی خێل و خیچ بۆ دەسەڵات چی دەڵێت؟

• فەلسەفە و دەسەڵات: مانا فەلسەفییەکانی ئازادبوونی کورد لەژێر دەسەڵاتی ستەمکاریی خۆراوای ئاسیادا چین؟ 

• ئەخلاق و دەسەڵات: پێناسەی ئەخلاقی مەدەنی لە پەیوەندی بە دەسەڵاتەوە لە جوگرافیایەکی دوور لە ئاکاردا چییە؟
• ئاوەزمەندی و دەسەڵات: ئاوەزمەندی تا چەندە ڕێگە بۆ دەسەڵات خۆش دەکات بە ئاراستەی ئازادی بۆ تاک و جڤاکدا بڕوات؟ چ ئاوەزمەندییەک (عەقڵانییەتێک) بۆ کۆمەڵ و دەسەڵاتی کوردی ڕزگاریبەخشە؟